Editorials

Kaibangpou chun nai kho

Aniu kandih khou sengthao- daithaomei taan guaina hei government ruina taanclou nina de tuna aniu chun khou rimloumei nai e. Akai taanc khang, akai cheng taanc khang rammethei akai tu- jang khang government rui tilou nina re tumei chun hei ganckei kho. Aniu kailuang tihei daithao mak ge tuna sa khang meijakmei su kho. Gansek rui akailuang tihei sakeimei ta lani makmei sukho. Akailuang gaithao mak bammei hei akhuai ni nai ding e tumei chun nai kho. Free puat ta kahaomei, discount puat ta kahaomei rammethei kaman huangmei puat ta kahaomei hei daithaomei lun thu ram mak ge. Mansei akhat rui ata jai thaoloumei ta nkhuanmei hei punkei bammei, boukeina karana thaoding dat ngam makmei rui kahaomei chun e. Aniu tuang lungluan khou government rui rammethei baimei mansei akhat rui nkhaloumei ta lanimei hei karana ding thao ngam makmei mansei tuang chun e. Mi thiak khou hei rui kalai pat khang karam khang kageh nai the.

Aniu kailuang khou, town rammethei kaikhun khou n-gin guangmei rammethei tarai guangmei nunta chakhuang suna riu chuiloumei hei aniu pu- pou gan thang rui taanc guang kanmei gaimei aniu tuang riak akhat re. Ntao daithaomei gan khou akai tuang gin rammethei akai khou tarai guangmei mansei thiak hei kalai guang the kumma gin ta chakhuang sumei thiak ni kalai guang the. Tiki, kaipou akhat rammethei kaibangpou akhat sumei chun naina taanclou kajimei bam nai bam geic dihe. Government employee kapeng thang rui posting guangmei rammethei business khang aram khou guangmei nun tihei riu chuilou khang khatni suchuilou khang kageh nai e.

Author Since: Oct 29, 2018