News, State News

Khouring ta ngeklou nimei lam khou seminar bam kan the

DihCham News Service

Tamenglong, October 22: Asei hei Tamenglong akidai khou naimei Zeliangrong Evangelistic Fellowship hall khou num khouring khouna lam khou seminar bam kan the. Mi tuang seminar tei Rain Forest Club Tamenglong, Tamenglong Forest Division, The Bombay Natural History Society, BNHS khatni Centre for Conservation of Nature & Cultivation of Science, CCNCS Manipur rui kariuna leng kan tuang e.

Num khou naimei Khouring Khouna guai ti hei tabui thiak khou geklou nina cho khatni tabui thiak khou sinsu nina cho tumei lam khou Mumbai, Kolkata khatni Imphal khou bammei thaihoumei nun rui resource person sulouna tatkei kan e. Mi khou tei tei Phalong, DEEPS, Dailong khatni Rain Forest Club Tamenglong, RFC khoumei member nun rui guang kajaolou kan e.

Tamenglong khou num thingbang, num khouring khouna guai ta ngek chuilou bammei the khatni ngekchuilou bam diu khang rui CCNCS tei rui RFC, DEEPS, Dailong, Phalong, Dailong nammei Chingkhiuluwang Pamei, Wildlife Honorary, Dr. Chambo Gonmei khatni Nahemiah Panmei kaniu khang certificate ni tilou kan e. Nthuan 23 October nung hei ni Phalong nam khou akhuaipui guang nga bamlou rap-rapmei bam khou tatna jaotatlou nah an tatdat puni the tuna sa e.

Author Since: Oct 29, 2018