DihCham News Service
IMPHAL, MAY 27: Manipur khou coronavirus rik rui ti anaolou bammei COVID- 19 rapuat nenglou bammei mansei kathan asei hei gaan pa-ngu nimpat dat kan the. Mitei rui kaguaina case 44 tangh kan the. Milung khou tei 4 thu gai datna kakai- kakai khou bam the tiki 40 hei suna thu active suna bam bam e tuna Health Department tuang Additional Director suna bammei khatni Manipur tuang COVID-19 Common Control Room tuang Spokesperson Dr. Khoirom Sasheekumar Mangang rui tithai pat kan the.

Asei nimpat kanmei mansei 5 tei, 2 rui JNIMS khou rui khatni 3 ruina RIMS khou rui e tuna sa e.

Manipur khou asei nganmei lung khou mansei 6834 khou test sumei gan khou 44 tihei jaopat kan tuang e tuna sana nenglou bammei 44 nun kak khou hei serious suna theih- su numei thiak khou thu bammei mek ge tuna sa e.

Midak khou hei, ntao hei mi state tuang bai- baimei district nun khou mansei 14039 ruina quarantine suna bam e. Kaniu pang khou tei 3746 ruina Institutitional Quarantine khou bam e, sameithu, kaniu tihei nthuk maina jao gutna bam e. Kaniu hei test suna positive suna nimpat mak sini nimpatlou kanmei mansei nunta kahitouloumei rammethei kakai kaikhunmei, tat nchamloumei kummei nun e. Kaniu khou mirik hei naibam rap puni e tumei thiak ramme tiki ramthaina bammei gai e tumei jeng rui lou bam tuang e tuna sa e. Kumma, liamloumei mansei 10293 tihei thu state peng thang rui guangmei jeng rui jeng 14 quarantine su khang kariak naimei lung khou tei lou bam tuang e tuna sa e.

Author Since: Dec 19, 2019