News

Tribal leader nun le Chief Minister COVID-19 lam khou pari ra kan the

Newmai News Network

Manipur Chief Minister ruina Tribalmei gaankhat khang njianmei lianna phei mbaanlou bammei, May 27.

Imphal, May 27: Manipur tuang Chief Minister N Biren Singh rui lenga tribal leader nun le asei hei Chief Minister Secretariat khou meitin bam kan the. Tabui su ethei COVID-19 tihei ti thingh nu puni cho tumei lam khatni lockdown ruina Chingmei nun rianra bammei lam nun kaphian geih kan e.
Asei tuang meeting hei kadai suna Ching khou lung bammei achanah nun tabui thiak lung bam cho, tabui rianramei lam nai cho tumei kaphian ncham khang rui lenglou tuang e tuna Chief Minister tei rui sakan e. Aseidou hei Manipur khou ni mi rapian hei neng pat geih bammei khou hei rapian lam thai chuimei, rule piu chuimei na ruina athung ngam khang di the tuna ni sakan e.
Kathiak nchumma rule piu thao mak ethei state daimei nun kum lik nga mi rapian hei Manipur khou ni jinlik pat numei cheng nai e tuna sa e. Latruan sa bammei ta ping rio, chulou rio tiki Home Ministry, Health Ministry, WHO, ICMR ruina sapatmei latdan nun tat tho piu chuilou o tuna sakan e. Jeng 14 school khou quarantine bam tangloumei khatni kaniu tuang test result negative patmei guai tho kai tat nu the, kumma nammei, kailiangmei guai ruina ni kaniu tatho khammei tilou dat ritho tuna sakan e.
Coronavirus rapian anaomei guai tihei tho kasiam gailou puni de tuna lumgai e, kalam thu doctor, nurse khatni paramedical team guai hei jingbang kalaan thai mak nga katpatna, lungning gutna taan taanh bam the. Aseiluan tuang rih hei meiguaina nchamma, machuang karina athung ncham ethei rapian tihei tho ngam puni de tuna ni N Biren Singh tei rui sakan e.
National Health Mission, Manipur ruina tipatmei COVID-19 awareness tuang leaflet Inpui, Liangmai, Rongmei, Zeme, Meitei Mayek, Aimol, Hmar, Kabui khatni baimei jaatti nun lat khou rui hiloumei leadernun khou tei njanlou kan e.

Author Since: Dec 19, 2019